Nao lang gewach te hebbe waas ‘t dan intelik zaoterdaag 19 augustus. Me meus um halluf tiën op de Statie van Venlo aanwezig zien um te vertrekke nao...... Jao, waohaer eigelik ?......Kölle !!!
D'n trein vertrok al mit vertraging vanoèt Venlo, waat John al aan ‘t dinke zat, aangezeen d'r euvergestap meus gaon waere in Mönchengladbach. Inderdaad meus d'r beej aankôms in M'Gladbach gekonstateerd waere, det ôs aansloèting neet gewach had, dus......verplich consumere op ‘t terras beej "Don Corleone".

Naodet we dan oètgeboemeld ware in de "Rheinexpress", woort d'r door de "ônbekinde" kinnis gemak mit "Brauhaus Früh" op de plaats van bestumming. Nao waat gekloek te hebbe, woort dan intelik opgetrokke nao ‘t officiële gedeilte van ôs bezeuk aan Kölle..... das " Rote-Funken-Plätzchen" ! Heej is "de Fäös" dan officieel onderscheide mit ‘t 1e Rote Fünkschen, umdet hae zich op biezôndere maniere verdeenstelik haet gemak veur de kepèl en de minse van Venlo en umstreke.
Vervolges vertrok ‘t gehièl nao de "Fischmarkt" beej de Rhièn, wao we mit 2-je sets d'r lekker op los getetterd hebbe. Ôs muzikale klanke kwame schienbaar good euver, aangezeen ôs "Flabbe-doeës" prima gevöld woort door de luusteraers. Ouk de winkelstraot woort nao verloup van tièd door ôs van mezièk veurzeen, waat neet door idderein as plezeerig woort ervare, maar wat door ôs perfek woort opgelos, door nog harder d'rin te knalle mit "Greased Lightning" !
	De raegen begôs van zich te laote spraeke zoeë rônd de klok van vièf oor - halluf zes, d'r woort beslaote um lekker te gaon schuule beej "Papa-Joe's". Beej binnekôms woort d'r al van diverse kante gevraog wanniër we zoele beginne mit speule, maar wie zich eine "nette" kepel betaamp, hebbe weej effe euverleg gehad mit "die Inhaberin" waonao ouk dees minse op eur winke bedeend woorte mit ôs klanke. ‘t werkde zoeë aanstaekelik, det "in no time" ein lange riej veur de deur stônd um binne te kinne kômme in dees kroeg ! "FLABBEDEIUS, ....WASS FÜR EINE GEILE KAPELLE" ware vuuël gebezigde weurd en de waorheid meug dan netuurlik ouk waal ens gezag waere.
‘t gehièl hebbe we dao aafgeslaote mit ein stökske veur d'n inwendige mins, want ‘t woort ech waal tièd, det we waat fatsoenliks te bikke krege as allein maar friet of "ein Currywurst" ! Muug, maar ziër voldaon kwame we oetintelik rônd ein oor of elluf truuk in Venlo en ware ‘t d'r waal euver ins det dit ech neet ‘t letste "Rote-Funken-Platz-Konzert" is gewaes...