10 oor verzamele beej de Antoniuskerk in Bliërick... Klokslaag 10 oor kômme de letste aanfietse. We waere verdeild in 3 groepe, kriège waat späön in de hand gedouwd en dan meuge we ôzze brunch en lunchpakketjes zelluf beej mekaar gaon zeuke... blièkbaar waas d’r te weinig veurbereidingstièd euver veur de organisatie um zelluf baodschappe te doon...
Taege ’n oor of elluf zièn we weer allemaol beejein beej Frank en Mariëlle in d’n tuin. De taofel is gedek en de koffie is klaor. Ouk Joris en Judith arrivere, zoeëdet we same aan d’n brunch kinne beginne. Mariëlle haet heerlijk werm vleis gemak en d’r is al waeke gespaard um idderein bliej te make mit ein gekaok kriel-eike. Ouk aan champagne is gedach en Roel wuurt verras mit ein täöt proème.
	Ein pilske wuurt nog geklep en dan de fiets op. Via Venlo en eine tarzanbaog beej de Viking geit ’t nao ’t veer in Steyl. Same mit ein aantal antieke tractors waere we nao d’n euverkant gebrach wao we ôs efkes op ’t terras zette um beej te kômme beej ein glaeske beer. Dao blièk, det ’t programma neet daorgeit, vanwaege ein sterfgeval en det we um vièf oor in Kessel môtte zièn um te gaon boeregolve. Of haet de organisatie gewoeën niks geregeld?? Ein pilske later wuurt de fiets weer gepak en blièk al gauw, det Kessel gen einddoel is, maar det we nao Kestièl De Berckt gaon. Toch blièf onduudelijk waat we gaon doon.
Beej ein volgend pilske wuurt ôs dao eine, ôndanks alle commentaar volhardende, jông duudelijk gemak, det we eine speurtoch mit vraoge môtte gaon loupe, waonao we eine sleutel zoele môtte vinde. Dae sleutel guuëf ôs toegang tot de gewelve, wao d’r eine gas hônderd jaor geleeje ein stel fraters en ein nûnke kwièt zièn gewaore. Meuge weej ze gaon zeuke, fijn is det.... Nao ein akelig avontuur is d’r nog eine gedrônke um van de “schrik” te bekômme en fietse we mit alleman nao Baolder veur einen barbekjoew beej Marcel en Anneke in d’n tuin.