Um 17.00 oor meuste weej ôs verzamele beej ’t Weis-hoès van wao weej vertrokke nao d’n houf-sponsor van ‘t “Szt. Paeper-projek”. Dao waort um 17.30 Oor begôs mit de ouverture van ’t Zomer-parkfees 2006. Dit jaor stônd det in ’t teiken van de Beatles LP “Sgt.Peppers Lonely hearts club band”. Heej ginge maonde van rippetisies aan veuraaf en det meuste weej noow laote zeen en huuëre. Um zes oor woorte weej door ôzze “mental-coach” veur ’t Stadhoes aafgeleverd, wao ’t al aardig vol waas.
In totaal zes Joekskepèlle kwame dao beejein waonao weej gezamelik nao ’t Julianapark trokke ônder de klanke van “All you need is love” oftewaal “Leefde is waat telt”. In ’t park bleek al gauw det ’t waal erg drök waas en weej woorte dan auk veuraan beej ’t podium in ’n hukske gedouwd.
	De bedoeling waas um nao aafsloèting van ’t äöpeningsconcert nog ‘ne kier te speule, maar ik gluif neet det ’t gans is euvergekômme in ’t park. Wie dan auk, ’t waas ein groeët fees. Twieë daag later waas d’r nog ein jaorliks hoeëgtepunt (dit kier zonder instrumenten) van Flabbedeius t.w. de Picknick der Gebroken Harten. Idderein had wat te bikke meigenaome en zoë genaote weej van ’n lekker hepke en drenkske in ’t zunke beej de klanke van Eddy Wally . Waat wils se nog mièr !!