Terwiel de dames zich gaon vergape aan Geer, Goor en René, pakke de hière 't fietske, mit volgepakde tasse mit luiers en snoep (en chips veur Roel). Vanaaf verzamelpunt Buskes geit ’t dan, via ’t zwarte water, nao de speultuin van Jagersrust. Gelökkig hebbe ze dao ouk nog ein terras beejgelag, zoeëdet we òzze koedeljach van aafstand good in de gate kinne halde...

Tösse de Witte mit citroen en Gouverneur Blònd door waere we mit sms-jes en tillefoontjes ouk nog op de huuëgte gehalde van de vorderinge van de “Toppers-express” wao de dames in zitte. Um ein oor vertrokke en nao anderhalf oor toch al in Wiert...det schuut lekker op. De jonge springe zich muùg op de trampoline, weej bestelle nog maar ein blònd...en de dames zitte in Eindhoven. En Bob... dae haet d'n daag van zien laeve, de ganse middaag knoevele mit Marleentje, zònder gestoord te waere...
	De rutschbaan wuurt ònveilig gemak, ze aete ein zekske chips, drinke waat, weej bestelle nog maar ein blònd...en de dames staon in de file beej Raamsdonksveer. Hebbe weej ouk weer waat um euver te lölle, want wao leet det eigenlijk??? As d’n hònger toesleit bestelle we pannekeuk. D’r wuurt good van gemiegeld en zoeë taege ein oor of zes, we hebbe net betaald en wille op de fiets stappe, dao belle de dames, det ze eindelijk in Amsterdam aangekòmme zien.

Op d’n truukwaeg blièke ze de fietspaad in de laup van d’n daag versmaald te hebbe, maar we kòmme (bijna) allemaol gans in Venlo aan. Allein Willem had iets te lang nimmer gefiets en waas ein bietje doorgezaete...