De dreej keuninge hadde de hakke nog neet gelich of ut boeremoosbal stônd alweer veur de deur en waal op 5 jannewarie. Door d'n ermen tak, kollega Joekskepèl De Mootwörm, zien we gevraog um eur te begeleide tièdes ut "kiendje laote kiëke" op d'n boeremoosbal.
Um hallef vièf meuste we verzamele beej 't Weishoès um aansloètend, in optôch, nao Venlo On Ice te gaon wao ut nieje broèdspaar van de Mustangs al paraat waas. Nao efkes keuvele met boere en boerinne ônderein zien we aansloètend in de kelder van D'n Haen eine goojen baom gaon legge veur d'n boeremoosbal. Ut moos en de wors ware euverheerlik. Umdet we nog waat tièd euverhadde hebbe we nog waat muzikale klanke de kelder in laote gaon en ware we al lekker opgewermp veur d'n bal. Aangekômme beej de Maaspoort hebbe we nog ein paar klep kinne drinke in ut artiestekefee. Um kwart veur nege mochte we de buun op wao we twieë of dreej nummers zoele môtte speule. Oètintelik is ut EIN nummer gewaore en auk nog ens ein nummer det neet op ut program stônd um te speule, oftewaal de polka van De Mootwörm. Al met al waas ut waal leuk um mei te doon en ônderdeil te zien van ut programma. Daonao hebbe we òs tösse de boere en boerinne gemingk en hebbe we genaote van eine leuke, gezellige en drökke boeremoosbal 2008!