Nao ein jaor van aafwezigheid waas ut zondaag 8 jannewari waer zoewièt. Dit altièd enerverende zaalvoetbaltoernooi veur gehandicapten waord daor Flabbedeius muzikaal opgeluusterd. We hebbe ôs flink gegaeve um de enthousias voetballende jônges en maedjes ein muzikale steun in de rök te gaeve. Groeëte aafwezige daen daag waas Henri. Dae zoot ongetwiefeld thoès aan de kachel te räökele mit zièn räökelièzer, want ut waas happig boète. Naodet weej de zaal werm gespeuld hadde zièn we de innerlikke mins gaon veurzeen van ein drenkse en veural vuuël vette hap. De kantine dreide d’r good beej. Vervolliges nog efkes in de zaal gespeuld en daornao nog ein halluf eurke in de kantine. Det waas ut hoeëgtepunt van d’n daag. Mit waal twieë dirigente kôs ut muzikaal gezeen al neet mier kepot. Ondanks twieë gans verschillende ritmes die aangegaeve woorte, klônk ut beej ôs en de luusteraers wie mezièk in de oere! Nummers wie ‘Everybody’, ‘Greased Lightning’en netuurlik ‘Heb je even voor mij’ zörgde veur ein gezellige sfeer. Ut waar weer eine geslaagden middaag.